Sawal balon ko rangne ka

Is duniya mein 3 tarah ke log hote hain, ek jo baalon ko rangte hain, do jo baalon ko nahin rangte, aur teesri category janaab mujhe behad pasand hai, woh baalon to tyag kar chain ki zindagi jeete hain. Khair ye masla hai pehli do categories ka, yeh ek aham sawaal hai, baal rangne ya nahin rangne ka.

Ab kahani ki shuruat agar khud se hi ho, to issey badiya kirdaar bhala kaun ho sakta hai. ji ji bas ab taliyan band karein aur mujeh ye kissa sunane bhi den, arrey bas bhi kariye. Arrey. arrey…KHAMOSH!

Haan to baat hai san 2011 ki, jab pehli baar mujhe bhi apne sar par thode bahot nahin, wo to barson se thhe, balki bhari tadat mein safed baal lehrate dikhe. ab khud ki badhai kya karun, par mera dil bahot bada hai, aur maine jhat unhein na kaewal apna man liya balki bachpan mein li kasam unhein yaad dila poori assurance bhi di. Ab wo kasam kucch is tarah thi, ki laal rang ke anokhe tints and shades kayi bekhauf mahilayon ke sar par dekh mujhmeein aisa khauf paida hua, jo bhulaye nahin bhulta. Bas tabhi ke tabhi maine bhi thaan li thhi, chahe safedi ki chamkaar chha jaye, par lalima hamare balon ko chho na paye.

ab badalte zamane mein khauf ka bhi evolution to hota hi hai. To khoobsurat Henna dyed hairdo se badte hain, aur phir raaton ki neend udane ayi natural dye ya ammonia free hair color, *ghane aur kale chamchamate baal *. Sunday ke din aisa lagta thha mano koi baal rangne ka tyohar ho, jinke bhi ghar jao sar par dye hue baal aur safed topi ka taaj nazar aata thha. Kitna daravna mahaul hota thha, aur phir uske baad khadi hoti thi musibatein, kinhein ke baal dum tod dete thhe, to kinhein ko allergy, aur ek function mein kaale baal hain to bhala doosre mein safed kaise. Maza to yun aata thha ki safed dadi mooch hon aur koyle se baal, na jaane kaun kise jhootla raha thha.

khair yeh sab to purani baatein hai, ab kasam khayi hai, to nibhani bhi padegi. So maine bhi shaan se kadam badaye, par is baat se to main bekhabar thhi ki ek baar, agar appke sar par reshmi safed baal dikhai dene lagein to uske baad uski tej roshni se  saamne walon ki aankhein chaundhiyane ke karan aap dikh nahin sakte. Ab jidhar jaun jisse miloon, bechare apni aankhein hi malte reh gaye aur kehte bhi kya, safed balon ko hi to kos sakte thhe. Ab chahe naayi ho ya bus mein baithein expert, ya khaaskar ke functions mein prospective shaadi broker, advice dena to banta hai na, akhir aapke balon ki wajah se, aapki is baal na rangne ki gair zimmedari ki wajah se, aapki insaniyat ke prati beinsafi ki wajah se, unhein kitni takleef sahni pad rahi thi. Ab agar aise mein wo aapko milte hi sabse pehle kewal aapke balon ko hi kosein to bhi janab aapko sharmindgi se doob marna chahiye. Kitne pyaar mein range log hain wo, ki kam se kam aapko jeete rehne ka mauka diya ja raha hai, basic rights to mil rahe hain na, chahe unko implement karne ke circumstances thode ulat pulat hon. kamaal hai, unki baat ko ansuna karna aapki khudgarzi hai haan!

Yun to mujhe hinsa mein jyada belief nahin hai, bas bachpan mein bhaiyon ke sath thoda bahut WWF khel liya karti thhi, aur ladakpan mein chherchhari karne wallon ko ek aadh baar badminton racket se ghayal kara thha, par uske alawa maine shanti se hi zindagi bitani chahi hai. Ab agar aise nihayati nek insaan ke balon se poori duniya par atyachar ho raha ho, to yaqeen maniye dil toot jata hai, mayusi aankhon mein bhar ati hai, khud ko dhikkarne se fursat hi nahin milti hai, yun samajh lijiye ki har saans bhari maloom padti hai. is kashmakash mein din raat ek ho jaate hain, par koi hal nai soojhta. ab maine chah kar to doosron ka bura nahin akrna chah na, aur phir insaan ne kaale chashme kyun banaye hain? laga lijiye apni aankhon par aur lagne lagiye stylish, agar aap branded products mein bhot zyada apnapan mehsoos karte hon, to dekhiye lage haath unko bananewalon ka bhi fayeda! Ab agar aapko takleef hai, to aap hi kyun na ilaaj kar lein, ek baar roshni hate to phir aap mujhe to dekh payenge na, phir se mujhse mere baare mein baat kar payenge na. kyunki jo na karne ki kasam khayi thi wahi tod di, to aap chah kar bhi mujhse nahin mil payenge. Phir to aapke samne khada hoga ek zimmedar, uo to date, tip top putla, jo maaf kariyega main to nahin hoon.

aap sabhi ko hone wali inconvenience ke liye mujeh waqai mein dukh hai, par khud ko na khone ki sahuliat to har insaan ke paas honi hi chahiye, maine to yeh azaadi bahut sambhal kar rakhi hai, safed balon se bhi zyada chamak hai uski, dekhne ayenge? kala chashma lagakar? mujhe intezaar rahega, chai piyenge aur itmenan se baatein kareinge. naye naye kisse gadhenge. tab tak ke liye alvida.

 

arrey haan, balon ko rangne ke kuchh behtereen products:

 

 

 

Advertisements

About poornimasardana

Travel and Observations acquaint me with the Existent Pluralities around us and I wish to share those. I indulge in narratives (illustrations, words and pictures), it being my most cherished pursuit.
This entry was posted in Uncategorized. Bookmark the permalink.

One Response to Sawal balon ko rangne ka

  1. jasleenthethi says:

    wahiyaaad!! OOpS..I mean Wah Yaar! 😉

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s